Հայաստանի Մասին Անդրադարձ` Կրօնական Ազատութեան Վերաբերող Ամերիկեան Զեկուցումին Մէջ:
Միացեալ Նահանգներու արտաքին գործոց նախարարութիւնը վերջերս հրապարակեց զեկուց մը` աշխարհի
մէջ կրօնական ազատութեան վերաբերեալ: Զեկուցումին մէջ առանձին հատուած կայ նաեւ Հայաստանի
մասին: Մասնաւորաբար գրուած է, որ Հայաստանի սահմանադրութիւնը կ՛երաշխաւորէ դաւանանքի
ազատութիւնը, այսուհանդերձ, կան օրէնքներ, որոնք որոշակի խումբերու համար կրօնական սահմանափակումներ
կը նախատեսեն: «Հայաստանի բնակչութեան 90 առ հարիւրը Հայ առաքելական եկեղեցւոյ դաւանողներ
են: Կրօնական փոքրամասնութիւններուն նկատմամբ ժողովուրդին վերաբերմունքը բացասական է»,
նշուած է փաստաթուղթին մէջ: Այդ բացասական վերաբերմունքը կը նկատուի նաեւ զանգուածային
լրատուամիջոցներուն կողմէ: Զեկուցումին մէջ կը նշուի նաեւ, որ Հայաստանի մէջ կրօնական
փոքրամասնութիւնները կը դիտուին իբրեւ վտանգ` պետութեան համար: Կը մէջբերուին շարք մը
հանրապետական գործիչներու խօսքերը, որոնք աղանդները կը նկատեն պատերազմէն ալ վտանգաւոր:
Ասոր հետ կապուած` զեկուցումին հեղինակները կը նշեն, որ յատկապէս Հանրապետական կուսակցութեան
անդամները ընտրութիւններէն առաջ կը շահարկէին աղանդներու նիւթը: